ТӦӦ ПАЗЫНДАҒЫ СПОРТ КОМПЛЕКСІНЕ ПРАЙЗЫ ЧӦПСІНГЕН
1044
29 ноября 2017
| Асхыс Чайааны
Ирткен неделяда Асхыс аймаандағы Тӧӧ пазы посёлокта саналығ чӱгӱрерінҷе «Хакасия кубогы» регион пазы сыйыхтарына тиксі Россия марии пайрамни азыпған. Пӱӱл ол 20-ҷі хати иртче. Анда Россияның 41 регионынаң спортсменнер араласханнар. Ідӧк марыға СССР-ның саблығ спортсменнері килгеннер. Ӱзінҷі кӱнінде республиканың СМИ-ларына алғым пресс-тур иртірілген.
Марығ 20 ноябрьда пасталған. Ол кӱн ипчілер классика оңдайынаң 5 километрге чӱгӱріп марығласханнар, иреннер - 10 километрге. Пазағы кӱнде спортсменнер пос оңдайынаң спринт чӱгӱргеннер.
Ӱзінҷі кӱнінде араласчылар тренировкалар иртіргеннер. Ідӧк СССР-ның саблығ спортсменнерінең пресс-конференция ирткен. Анда Хакасияның спорт министрі Сергей Головкин, Россияның саналығ чӱгурерінҷе спорт федерациязының вице-президенті Пётр Логвинков, Олимп ойыннарының чемпионы Наталья Баранова, тилекей чемпионы Анатолий Иванов, Олимп ойыннарының ікі хати чемпионы паза сыйыхтығ орынға сыххан Тамара Тихонова, Олимп ойыннарының тӧрт хати чемпионы Николай Зимятов, марығларның ӧӧн чарғыҷызы Василий Балясников паза саналығ чӱгӱрерінҷе чоннар аразындағы федерацияның кізізі Вячеслав Веденин араласханнар. Олар, Тӧӧ пазындағы спорт комплексін паалап, кӧңнілерінең ӱлескеннер.
Сергей Головкиннің чооғынаң, пу марығнаң иң кӱстіг спортсменнер саналығ чӱгӱрерінҷе сезонны асчалар. Хакасияа улуғ аалҷыларны удурлиры улуғ ӧрініс полча. Саблығ аалҷылар килгені паза алғым марығларны иртірері пістің регионыбысты кӧдірче.
Вячеслав Ведениннің чооғынаң, мындағы трассаларда аның пабазы кӧп чыл спортсмен паза тренер полып тоғынған. Тӧӧ пазында чахсы кӱннер турча, олар марығлар иртірерге килістіре полчалар. Мында улуғ стадион, чахсы трассалар, чарғыҷыларға алынҷа тура пӱдірілген. Паза спортсменнерге чуртир чахсы оңдайлар тимнебіскеннер.
В.В. Денщиков чиңiсчiлернең хада
Василий Балясников марығ оңдайларынаңар искірген. Аның чооғынаң, ипчілер пос оңдайынаң 5 километр чӱгӱргеннер, иреннер -10 километр. Ікінҷі кӱнінде спринт ирткен. Іди ипчілер аразында 5 чарыс ирткен паза иреннернің - 5 чарыс. Финалға пис ирен паза пис ипчі сыххан. Анаң классика оңдайынаң спринт ирткен. Ипчілер 10 километр чӱгӱргеннер, иреннер -15 километр. Марығда 500-че кізі араласча, оларның санында ікі саблығ спорт узы паза чоннар аразындағы класстығ 23 спорт узы марығласча. Москвадаң 29 кізі килген, Татарстан Республикадаң - 35 кізі, Свердловск облазынаң - 28 кізі, Тюмень облазынаң - 33 спортсмен, Ханты-Мансийск автоном округынаң - 23 кізі, Хызылчар крайынаң - 32 кізі, Новосибирск облазынаң - 39 спортсмен. Пасха даа регионнардаң кӧп спортсмен килген. Хайди таныхтаан Николай Зимятов, Тӧӧ пазында илбек спортсменнер алтын медальларға пастағы хаалағларын иткеннер. Амғы туста спорт комплексі илееде алыс парған. Пістің хазнада, футбол чазыларынаң, хоккей площадкаларынаң паза бассейннердең пасха, саналығ чӱгӱрерінҷе кіннер пӱдірілчеткені саблығ спортсменні ӧріндірче. Тӧӧ пазындағы спорт комплексі уғаа чахсы. Мының алнында пеер тренировкаларға спортсменнер 15 октябрьдаң сығара кил турғаннар.
Піс пастап Пермь городта тимненҷеңміс. Сезонның пастағы марии - «Урал кубогыі» - Свердловскта иртчең. Анда пастағы орынға сыххан спортсмен Тӧӧ пазында тимнен турған. Андада мин пеер кил турарға чаратхам. Мында тимненген соонда, чидіглерім ӧс сыххан, - чоохтаан Николай Зимятов.
Тамара Тихонова Тӧӧ пазынзар пастағызын пір сезонға 1982-1983 чылларда килген. Че андада профилакторийде чуртаҷаң орын чох полған. Іди ағаа аал чуртағҷызының туразында чуртирға киліскен.
- Пазағы чылда піс профилакторийде чуртаабыс. Піснең хада двоеборецтер паза биатлонисттер чуртааннар. Кӧп тус марығларға тимненҷеңміс. Піснең хада саблығ спортсменнер полғаннар. Пӱӱнгі кӱнде Россияда мындағ спорт кіні пӱдіріл парғаны ӧріндірче. Кӧп регионда мындағ алғым стадионнар полған полза, чахсы поларҷых, - теен Тамара Ивановна.
Анатолий Иванов трассалар 950 - 1100 метр пӧзікте орныхчатханы чахсы оңдайлар тіп таныхтаан. Мындағы кииде кислород асхынах. Андағ орыннарда спортсменнер тренировкалар иртірчетселер, чабыс орыннарда марығлазып, чахсы чидіглерге читчелер.
Тӧӧ пазында СССР-ның піріктірілген командазы тимненҷең. Анатолий Иванов 2000 чылдаң сығара спорт комплексі илееде чахсыланыбысханын таныхтаан.
Пётр Логвинковтың чооғынаң, 2011 чылда пеер килгенде, пӱдірілчеткен спорт кінінде прай тоғыстар толдырыл парарына киртінмеен. Че Хакасия пазы Виктор Зимин паза спорт министрі полған Валерий Денщиков спорт кіні пӱдіріл парар тіп прайзын ізендіргеннер. Тӧӧ пазында спортсменнер 43 чыл изере чыылысчалар. Ол тус аразына олар Олимп ойыннарында 30 алтын, 24 кӱмӱс паза 18 хола медаль холға киргеннер. Олимпиадаларда утхан 26 спортсмен Тӧӧ пазындағы трассаларда тимненген.
Пресс-конференция соонаң орындағы Культура туразында марығның ікі кӱнінде чиңіс тутхан спортсменнерні чеестееннер. Анда Хакасия пазы орынҷызының тоғызын толдырчатхан Владимир Крафт, Хакасия пазы администрациязының устағҷызы Валерий Денщиков паза Хакасияның спорт министрі Сергей Головкин араласханнар.
Оңдай киліскенде, пірее спортсменнернең чоохтазып алғабыс. Антон Косточаков Хакасия ӱчӱн турысча.
- Мин пис чыл саналығ чӱгӱр чӧрчем. Тренерім Александр Иванович Карачаков полча. Узымны ам даа кӧдірерге кирек. Пӱӱл классика оңдайынаң 10 километрде уйан чӱгӱрібіскем. Азахмеетте 237-зі пол парғам. Спринтте - 186-ҷы орында. Ирткен чылда пу дисциплинада 221-ҷі орында полыбысхам, - чоохтапча Антон.
Таласпай Даут марығларға Казахстаннаң килген. «Хакасия кубогында» ол пастағызын на араласты. Спортсмен марығлар хайди иртірілчеткеніне чӧпсінген.
- Спорткомплекс кӧңніме кірген. Марығ пӧзік синде иртче, уғаа хазыр парча, мында кӧп кізі араласча. Казахстанда пу син кізі хаҷан даа марығласпаҷаң. Мин саналарға орай, 13 частығда ла, турғам, аннаңар пӧзік чидіглерге читкелекпін. Ӱс чыл саналығ чӱгӱріп, амға теере узымны таптапчам, - теен Таласпай.
Марығ пайрамни азылғанда, сценазар Владимир Крафт сыххан. Ол Хакасия пазы Виктор Михайлович Зиминнің адынаң спортсменнерні паза оларны тимнепчеткен, чиңістерге ағылчатхан спорт ветераннарын алғыстаан:
- Тӧӧ пазы сірерге чол асхан. Мында саблығ спортсменнер тимненгеннер.
1954 чылда Владимир Кузин, 30 паза 50 километрге чӱгӱріп, совет спортсменнерінің аразында пастағы тилекей чемпионы полыбысхан. Анзы сидік дисциплиналарға саналча. Олимп ойыннарында паза тилекей чемпионадында пу кӧрімнерде утхан спортсменнерні «Саналарның корольы» адаҷаңнар.
Николай Зимятовтың кӱзі кӧрінген. Ол, ала парыс чіли, 50 километрні табырах чӱгӱрген. Ол илбек хазна ӱчӱн турысчатханын пілінген.
Тамара Тихонова 1982 чылда, 18 частығда, Галина Кулакованың саналарын алып алған. Аның соонда ол ікі Олимп ойыннарында чиңіс тутхан. Тихонова эстафеталарның специализі полған. Ол уғаа нандырығлығ дисциплина полча. Мында син алнында паза соонда чӱгӱрчеткен арғыстарыңның ӱчӱн турысчазың.
Тӧӧ пазында чахсы стадион пӱдіріл парған ӱчӱн Россияның саналығ чӱгӱрерінҷе спорт федерациязына паза республикаа алғызым читірчем. Пу спорт комплексі прай хазнаа кӧп туза ағылар.
Ідӧк пайрамнығ мероприятиеде Валерий Денщиков, Сергей Головкин паза СССР-ның саблығ спортсменнері чоох тутханнар. Анаң марығ чиңісчілерін чеестееннер.
Ипчілер аразында, 5 км классика оңдайынаң саналығ чӱгӱріп, 1-ғы орынға турысхан Светлана Николаева (Архангельск облазы - Ярославль облазы - РФ ВС). Иреннер аразында 10 км классика оңдайынаң марығда 1 орында - Станислав Волженцея (Коми Республика). Спринтте, пос оңдайынаң марығлазып, 1 орынға сығып алғаннар Татьяна Алёшина (Тюмень облазы) паза Андрей Парфёнов (Тюмень облазы).
Автор : Антон ЧЕРТЫКОВ
4 мая 2024 года
+18°C
8 (39045) 9-12-52
