Ирткен чылның 28 декабрьында «Афалина» бассейнні пайрамни азарына Хакасия пазы Виктор Зимин, республика пазының администрация устағҷызы Валерий Денщиков, спорт министрі Сергей Головкин паза пасхазы килгеннер. Абрек Челтыгмашевтің чооғын исте, прайзы хатхырыза тӱскен. Ол хаңалҷостанған даа полза, аның чооғында сын чардығы парох. Чоныбыс анзын чахсы пілче. Пӧзік оол-хыстар - улуғларыбыстың поғдархазы. Сағынчам, кічігдең ала чӱзерінең айғазып, палаҷахтар андағох сыдамах паза сыырах поларлар.
Хакасия пазы Виктор Зимин чыылған чоннаң ікі тілнең изеннескен. Бассейнні пайрамни азарында аралазарға чеес пирілгені ӱчӱн алғыстаан паза пу уғаа кирек спорт туразы аймах пазы Абрек Челтыгмашевтің пастаа полған тіп таныхтаан.
- Ноға Асхыста бассейн пӱдірерге чарадылған тіп сурарзар, - чоохтанған республика пазы.
- Ол ӧнетін таллағ полбаан Хакасия пазына турғызылған чылдох минзер Валерий Денщиков паза Абрек Челтыгмашев Асхыста бассейн пӱдірер сағыснаң айланғаннар. Чарадыбысхабыс. Пӱдіріг пасталыбысхан, че пу чылларда ахча киреенең оой ла полбаан Андағ даа полза, сағыс толдырылған. Ниме амды Асхыс аймаа чуртағҷыларының пар? Сергей Карамчаковтың адынаң спорт комплекс, футбол чазызы паза бассейн! Аймахтың чуртағҷыларын мындағ хайхастығ спорт туразынаң алғыстапчам.
Хакасия пазы Виктор Зимин Валерий Денщиковха, Абрек Челтыгмашевке паза аның командазына сыдамахтары, кӱстенҷіктері ӱчӱн алғыс читірген. Пӱдірігнің ӧӧн подрядчигі «Хакасгражданстрой» Ооо-ның директоры Олег Манжулаа ідӧк алғыс сӧстері читірілген. Спорт пӱдіріглерін турғызары уғаа нандырығлығ тоғыс нооза, кирексіністер кӧп.
Хакасия пазының алғыстас пічии бассейн пӱдіриинең айғасхан специалисттерге, устағҷыларға читірілген: спорт министерствозының советник Виталий Машинге, Асхыс аймаа пазының пастағы орынҷызы Галина Новиковаа, «Хакасгражданстрой» ООО-ның директоры Олег Манжулаа, Асхыс аймааның пӱдіріг паза чурт политиказынҷа управление пастығының орынҷызы Виталий Капустинге, ӧӧн специализі Сара Майнагашеваа, I категориялығ специализі Аркадий Герберге. Алғыстас пічіктері читірілген соонаң сӧс пирілген аймах пазына.
- Асхыс аймаа пазына хатап табылып, мин ӱзінҷі чылы тоғын парим. Ӱзінҷі чылы Наа чылға удур піс Виктор Михайлович Зиминнең хада Асхыс аймаанда наа пӱдіріг асчабыс. 2015 чылда ол полған Ис пилтіріндегі ортымах школа, 2016 чылда - Катановтағы ортымах школа, пӱӱл -«Афалина» бассейн. Ағаа хоза Палыхтығ суғда имнег туразының пӱдірии тоозылча. Аның ӱчӱн - улуғ алғыс!
Асхыс аймаа пазы ідӧк алғыстастар тимнеп салтыр. Иң пастағызын алғыстас Хакасия пазы Виктор Зиминге читірілген. Алынҷа алғыс сӧстері алында спорт министрі полған, амды республика пазының администрация устағҷызы Валерий Денщиковха читірілген. Спорт министерствозының, аймах устағ-пастааның специалисттері, пӱдірігҷілер ідӧк махтаттырғаннар.
Оӧн чардығы соонаң аалҷылар бассейн туразын кӧргеннер. Оӧн залда аалҷыларны Тӧӧ пазынаң килген суғда чӱзерінҷе айғасчатхан оолах-хызыҷахтар сағааннар. Олар узуны 25 метр, 6 чоллығ бассейнге иң пастағызын кіргеннер. Чиит спортсменнерні суға позытханнар «Афалина» бассейнде тоғынар инструкторлар Николай паза Евгений Сагалаковтар. Николай Сагалаков Россияның хазна физкультура университедін «Тағзар сығар спорт кӧрімнері» специальностьча тоосхан. Вузта студенттер прай даа спорт кӧрімнерін ӱгренгеннер, оларнаң тӧреміл айғасчаңнар, кӧзідімге, полған на кӱн пір час суғда чӱсчеңнер. Евгений Сагалаков Н.Ф.Катановтың адынаң Хакас хазна университедін «Физкультура» специальностьча тоосхан. Бассейн директоры Фёдор Боргояковтың искіриинең, суғда чӱзерінҷе спорт кӧрімінең айғазарға олғаннарны 7 частаң сығара алып пастирлар. Ідӧк бассейннең прай чуртағҷыларға тузаланҷаң оңдай пирілер. Пір час 150 салковайға турар. Бассейнзер чӧрерге сағынчатхан чуртағҷыларға имҷідең справка киректелер.
Чоохтирға кирек, бассейндегі суғны, киині паза анда чӱзерге килген чуртағҷыларны сыныхтап турар фельдшер Наталья Мылтыгашева. Специалисттің сӧстерінең, тоғысты апарарға федеральнай кирексіністер полысчалар: чуғынҷах ағырығлардаң тоғыр тоғыстарҷа, суғны, бассейн пӧлиин арығ тударынҷа.
Бассейн пӧлиинең пасха кип-азах алыстырҷаң, чуунынҷаң, тренажёр пӧліктері пар. Ікінҷі хадылында устағ-пастағ орнығар. Мындох марығларда «ағырчатханнарға» орын кӧріл парған.
- Мында хайдағ сілігдір, - хайхапча тынағдағы ипчі Тамара Ботина. - Тура істі талай хоостарынаң чазал партыр, суға чағын полчатханы пеер кірзӧк пілдірче. Бассейндегі суғ чи хайдағ хайхастығ чарых кӧк ӧңніг! Талай сууна тӧп-тӧӧй Піс бассейннің тимге сых парарын чидікпин сағаабыс. Наа чылға хандыра сыйых! Ӧрінчебіс. Пастыхтарға алғызыбыс читірчебіс.
Тамара Ботина сӧбірезінең суғда чӱзер ӱчӱн талай хазынзар ла чӧрбеен, хости орныхчатхан бассейннерде полтырох - Абазада паза Тӧӧ пазында. Тиңнестірҷең оңдай пар. Сара Майнагашева, тізең, бассейн азылғанына Лиза пархаҷаанаң хада килген. Ағаа читі час, аннаңар ол суғда чӱзерінең айғазарға сағынча. Пиҷезінің соонҷа оолах туңмазы чӧрерӧк, ағаа амды ікі час таа чоғыл.
Чоохтирға кирек, бассейн 2010 чылдаң сығара федеральнай, республика паза муниципалитет бюджеттерінең пирілген ахчаа пӱдірілген. «Россияда физическай культура паза спорт тилізі 2006 - 2015 чылларға» федеральнай программа хоостыра бассейнге спорт-технология оборудованиезі алылған. Тиксі пӱдіріг 77 миллион салковайға тур парған.
Асхыс аймаанда аймах спорт кӧрімнерінең айғасчаң оңдайлар тӧстелче. Бассейн, тізең, олғаннарға паза пір спорт кӧрімінзер чол асча. Ізенчебіс, аймах пазы Абрек Челтыгмашевтің сағызы толар, Асхыста суғда чӱзерінҷе хакас чемпионнар ӧзер.
Автор : Наталья СУБРАКОВА
3 мая 2024 года
+16°C
8 (39045) 9-12-52
1104
15 января 2018
| Асхыс Чайааны 
