Рубрики

ОЛҒАННАР ЧАЙААЧЫЗЫ

561 17 мая 2018 | Общество, Асхыс Чайааны

Аалдағылар пу концертті чахсы пілчелер. Искусство школазының ӱгренҷілері чыл сай сан пирістіг концерт кӧзідедірлер. Улуғлар аны чидікпин сағидырлар.

Залға чон толдыра. Ӧӧн кӧрігҷілер - іҷе-пабалар. Олар, неке, палаларыох чіли чилексірепчелер. Концертті сағыпчалар.

 Мына музыка истіл сыхты. Кӧзеңе азылча. Чазан салған олғаннар пістің чонның кӧг тиріглерінең ойнапчалар. Оларнаң хада школа устағҷызы Неля Иптышева. Ол пу ӧменең устапча. Чон олғаннарны айа сабызынаң удурлапча.

Концертті апарчатхан хыснаң оол, пісті пу ӧменең таныстырып, чоннаң изеннесчелер. «Акварель» хореография ӧмезінің кічіглер группазы сценаа сыхты. Кічіг теелбекчілер улуғ арғыстарынаң халбастар, хандыра теелбектенчелер. Оларнаң устапча Лариса Тюльберова.

Юлия Ташкенова устапчатхан «Алас» ансамбль, сценаа сығып, пісті ӧріндірче. Оларның соонаң ырҷылар сценаа сыхчалар. Пу школаның пастағы класстағы ӱгренҷілері полар. Оларны Татьяна Каменщикова ӱгретче.

Анаң Тарика Токмашова устапчатхан национальнай кӧг тиріглерінең ойнапчатхан «Алтын» ансамбль узын кӧзіткен. Снежана Асочакова ӱгретчеткен ікі хызыҷах Изабелла Юнгеймнең Анастасия Короткова «Мама и дочка» сарынны толдыр пиргеннер.

Анаң баянисттер ансамбльы ойнаан, аннаң Изольда Тоданова устапча. Соонаң аныңох ӱгренҷізі Ваня Полисовой баяннаң ойнаан. Оолах илееде марығларның лауреады.

Неля Иптышева сценада чахсы ӱгренчеткен палаларға алғыстас пічіктерін читірген. Ідӧк ол школа чуртазында ӧткін араласчатхан паба-іҷелерні адаан, оларға Аарластығ пічіктер читірген.

Автор : Михаил ИДИМЕШЕВ

Комментировать  

Другие новости