ХАКАСИЯ ПРАВИТЕЛЬСТВОЗЫНЫҢ ТУРАЗЫНДА ТИКСІ ХАЗНАБЫСТЫҢ «РОССИЯНЫҢ ИҢ АРТЫХ 100 ТОВАРЫ» МАРЫҒНЫҢ ПАЗА АНЫҢ «ХАКАСИЯНЫҢ ИҢ АРТЫХ ТОВАРЛАРЫ ПАЗА ПОЛЫЗЫҒЛАРЫ» РЕСПУБЛИКА СИНІНІҢ ЧИҢІСЧІЛЕРІН АЛҒЫСТААННАР. ТАНЫХТИРҒА КИРЕК, ПӰӰЛ ОЛ 20-ҷі ХАТИ ИРТІРІЛГЕН. ХАКАСИЯ МАРЫҒДА СЫБЫРА ӦТКІН АРАЛАСЧА, ЧЫЛ САЙ ПӦЗІК АРАЛАСЧЫЛАР САНЫН КӦЗІТЧЕ. РЕСПУБЛИКА МАРИИНДА ПӰӰЛ 40 ПРЕДПРИЯТИЕ АРАЛАСХАН, ФЕДЕРАЛЬНАЙ СИНДЕ - 23.
Пайрамнығ чыылығны республика пазы Виктор Зимин асхан. Ол, марығ чиңісчілерін паза лауреаттарын удурлап, таныхтаан: «Сірернің кӧбізі марығда нинҷе-нинҷе хати араласхан паза чиңісчі адына пір ле хати турыспаан, кемге-де, тізең, пу пастағы чидіглер. Хайдағ даа полза, марығда аралазарға сағынчатханнарның саны илееде полча. Анзы бизнестегілернің сығарчатхан ниме-нооларының паза чонға пирчеткен полызығларның синін тореміл чахсыландырарға, товарлар аймағын алғыдарға паза оларны республикабыста, хонҷых регионнарда садар оңдайларны тилідерге сағынчатханнарын киречілепче. Сағынчам, «Россияның иң артых 100 товары» танығ пу пӧгіннерні толдырарға полызар. Марығда араласханы, уламох анда чиңіс тутханы предприятиее ле нимес, тиксі республикаа чахсы реклама полча. Пӱӱнгі кӱнде Хакасияда сығарылған ниме-нооны Россия-да даа, пасха хазналарда даа чахсы таныпчалар». Ідӧк чооғында Виктор Михайлович сидіксіністіг сурығларны ӱзӱрер, оларны чаратчаң оңдайларны табар пӧгіннең бизнестегілернең тоғазығлар иртірерге тимдезінеңер искірген.
Пӱӱл «Качестводағы чидіглер ӱчӱн» танығнаң тӧрт организация таныхтатхан: «Вдоволь» ООО, «Металлодизайн» мебель компаниязы, «Боградтағы ГОК» ООО паза Харатастағы тағ-пӱдіріг техникумы. Тиксі хазнабыстың «Россияның иң артых 100 товары» марығның лауреаттары полыбысханнар: «Саянмолоко» ООО, идінҷектер Л.В.Миндибекова, А.М.Зубарев, Хакасияның кӧп полызығлар пирҷең кіні. Дипломанттар санындалар: «Курорт «Озеро Шира» ОАО, Хакасияның потребительлер обществоларының пірігізі, «Альпина» ООО, идінҷектер Н.Г.Боргоякова, И.И.Миндибеков паза пасхазы.
Идінҷек Наталья Боргоякова талған сығарча. Итсе, пос киреен тилідерінде олар прай туғанчағыннарынаң істенчелер. Танығлығ сыйыхты аларға аның харындазы Павел Боргояков килген. Аның чооғынаң, талғанны, тимнеп, садыға сығарары іҷезінің сағызы полған, ол киректі пастаан, цех асхан. 2004 чылдаң талған садып пастааннар.
«Хакасияның иң артых товарлары паза полызығлары» марығда пос идінҷек ікінҷізін араласча. Ирткен чылда ол республика синінде кӱзін сынап кӧрген, андада марығда араласхан ӱчӱн грамотанаң таныхтатхан. Пӱӱл, тізең, федеральнай синге сығып, анда сыйыхтығ орынға турысхан.
Павел Геннадьевичтің таниинаң, олар пу чидігде тохтирға сағынминчалар, мыннаң мындар наа продукция сығарып пастирға тимненчелер. Ідӧк ол талған сығарызынаң палғалыстығ хай пірее сидіксіністерінеңер паза оларны чарадар оңдайларны таапчатханнарынаңар чоохтап пирген. Кӧзідімге, амғы туста арба хоорҷаң ӧнетін оборудование чоғыл, аннаңар аны посха идерге килісче.
Чарытхы паазы аарлығдаңар арбаны газнаң тоғынчатхан пестерде хоорып пастапчалар. Талғанның качествозы пір синніг ползын тіп, Павел Геннадьевич пестің тоғызын сыныхтағда тудар микроконтроллер (электроннай устройстволар тоғызынаң устапчатхан микросхема) турғысхан. Аннаң орта тузаланарына, тоғындырарына ол позы ӱгренген. Микроконтроллеры орта тоғындырар ӱчӱн, ағаа ӧнетін программа пазарға кирек полчаттыр, аннаңар Павел Боргояковха ідӧк программирование тілінеңер пілістер аларға киліскен. Амды ол кирек программаларны позы пасча.
Арбаны газта хоорчатханының чахсы сари парох, пу оңдай талғанның кибірли тимнелчеткеніне чағын нооза. Сағам газта пуғдайдаң на арба тимнепчелер, кӧчені хоорары сала пасхалалча, мында хай пірее сидіксіністер пар. Ідӧк идінҷектер тас теербенін ит саларға сағынчалар.
Идінҷек Наталья Боргоякова хакас чонның ас-тамаан пӱӱнгі кӱнде Тувазар, Хызылчарзар, Новосибирсксер сатча. Ідӧк ол Интернет-магазиннең хада тоғынып пастабысхан. Ол талғанны, идінҷектең алып, Россияның кидеркізінзер сатча.
Паза «Россияның иң артых 100 товары» марығның дипломанты полыбысхан пір идінҷекті Хакасия чуртағҷылары чахсы таныпчалар. Ол - Иван Миндибеков.
Иван Иванович пос киреенең 21 чыл айғас парир. «Россияның иң артых 100 товары», «Хакасияның иң артых товарлары паза полызығлары» марығларда ол пӱӱл тӧртінҷізін араласты. Аның чооғынаң, пу танығ кӧп ниме пирче. Кӧзідімге, республикада аның ас-тамаан чахсы таныпчалар, алчалар. Россия марииның чиңісчізі полыбысханы пасха регионда садығ тураларынаң чӧптезіглер апарарын нииктепче. Ол танығ сығарған нименің качествозы пӧзік полчатханын таныхтапча нооза.
Идінҷек Иван Миндибековтың ас-тамаа Тувада, Хызылчарда, Минсуғда садылча. Ол консервалар сығарҷаң цехты тоғындырарға сағынчабыс, андада продукцияны Сибирьдегі регионнардаң пасха даа регионнарзар тартар оңдайлар полар тіп чоохтапча. Ідӧк пӧгіннерде - Ағбанда паза Саяногорскта сығарған нимелерні садар пос садығ тураларын азары.
Хайди таныхтапча Иван Иванович, пос киреен хайди даа тилідерге кирек. «Чӧріс - ол чуртас. Чидіп алған нимеде тохтабыссаң, банкрот пол парарзың, - чоохтапча ол. - Виктор Михайлович орта теен, піс, идінҷектер, парыс ағылар нимелерні пӱдіреріне кредиттер алчабыс. Пӱӱн пір дее ниме пӱдірбин одырыбызарға чарир, че андада онҷа чыл пазынаң пос киреен чабарға килізер. 21 вектің технологияларынаң пӱӱн тузаланмаза, таңда орай полар».
Иван Миндибеков пӱӱнгі кӱнде пос кӱзінең айғасчатхан киреен тилітче. Итсе, консервалар сығарҷаң цехтың программазын арачылабысханда, Хакасия правительствозы заводха читіре чолны пӱдірерге хабас пирерге молҷаан. Аның ӱчӱн идінҷек республиканың устағ-пастаана алғызын читірче.
Ідӧк марығ араласчыларын экономика тилізі министрі Татьяна Пауль алғыстаан. Ол килчеткен чылда «Хакасияның иң артых товарлары паза полызығлары» бренд тӧстелер тіп таныхтаан. Мындағ танығнаң тузаланар оңдай республика марииның чиңісчілеріне пиріл турар. Танығ идінҷектерге постарының сығарчатхан ниме-нооларын садарға, сығарысты тилідерге полызар паза республика адын кӧдірер тіп кӧрілче.
3 мая 2024 года
+15°C
8 (39045) 9-12-52
1504
27 декабря 2017
| Асхыс Чайааны 
