Рубрики

КІЗІЛЕРНІҢ ПРАВОЗЫ ӰЧӰН ТУРЫСЧАЛАР

295 31 мая 2018 | Общество

Ӱлӱкӱн. Ағбанда Россия полициязының 300 чылына чарыдылған пайрамнығ мероприятие ирткен.
АҒБАНДА ТИМІР ЧОЛ ВОЙСКОЛАР БРИГАДАЗЫНЫҢ КУЛЬТУРА ТУРАЗЫНЗАР ПРАЙ РЕСПУБЛИКАДАҢ ПОЛИЦИЯ ТОҒЫНҶЫЛАРЫ ЧЫЫЛЫСХАННАР. ПАЙРАМНЫҒ ИИРДЕ ХАКАСИЯ ПАЗЫ ВИКТОР ЗИМИН АРАЛАСХАН. ӰЛӰКӰН ПАСТАЛҒАНДА, СЦЕНАА РОССИЯ МВД-зының ЗНАМЯЗЫ СЫҒАРЫЛҒАН, СИМФОНИЧЕСКАЙ ОРКЕСТР РОССИЯ ПАЗА ХАКАСИЯ ГИМННЕРІН ТОЛДЫРҒАН.
Хайди таныхталған ӱлӱкӱнде, Россияның полициязы император I Петрның чахиинаң 5 июньда 1718 чылда тӧстелген. Право хайраллаҷаңнар хаҷан даа хазна кирексіністері ӱчӱн турысчалар. Сайбағлардаң тоғыр кӱрезіп, олар кізілер чуртазын паза праволарын арачылапчалар.
Хакасия пазы Виктор Зимин, сценазар сығып, полиция тоғынҷыларын алғыстаан. 
- Полицияда алызығлар полза даа, ӧӧн пӧгін кізілернің хорғыс чох чуртазын, оларның ниме-нооларын арачылиры паза халых чонның амырын хадарары полча. Сірер хаӌан даа кізі правозы паза пістің илбек хазнаның амыр чуртазы ӱчӱн турысчазар. Амды наа хорғыстар сығысчатханда, наа оңдайларнаң тоғынарға килісче. Сірер терроризмнең паза экстремизмнең тоғыр кӱресчезер. Пірее чобағ пол парза, МВД тоғынӌылары аннаң хыйа турбинчалар. Кізілерні арачылирға сірер иң пастағыларның санында килчезер. Республикада ла нимес, ідӧк Алтынзархы Кавказтағы командировкаларда, служба апарып, полиция тоғынӌылары сыбыра махачы тудынчалар.
Терроризмнең тоғыр кӱрезіп, кӧп тоғынӌы хазна сыйыхтарыңа турысхан. Служба тузыңда чуртастарын пир салған тоғынҷылар чонның сағызыңда халзын. Пу аар службаны таллап алғаннарға алғызым читірчем. Хакасия хазнаның иң амыр регионнар санына кірчеткеңі - сірернің тоғызыңарның салтары. Анынаң кізілернің истіг чуртазы, бизнес паза экономика тилізі палғалыстығ. Чылдаң чылға сайбағлар саны хызырылча. Саарбахтар иткең сайбағлар саны тӧрт хати хызырыл парғаң. Анзы профилактика тоғызынаң палғалыстығ, - таныхтаан Хакасия пазы.
Чооғын тоозып, Виктор Зимин службаны турыстыра апарчатхан тоғынӌыларға сыйыхтар читірген. «Хакасияның істеніс сабланызы» медальнаң сыйыхтатханнарның санында МВД-ның Таштып аймаанӌа пӧлік пастығы полиция полковнигі Гаврил Шулбаев полған. Аарластығ пічікнең Асхыс аймаанӌа ОМВД-ның ГИБДД пӧлиинің пастығы полиция майоры Михаил Иптышев сыйыхтатхан.
Хакасияӌа істіндегі киректер министрі Андрей Кульков, сценаа сығып, полиция тоғынӌыларына алғыстас сӧстерін читірген. Аның чооғынаң, істіндегі киректер органнарында кӧп алызығлар полған. 300 чыл аразына право хайраллаӌаңнарға кӧп сидіксініс тоғасхан, че олар пӧгіннерін турыстыра толдырғаннар. Полиция тоғынӌылары полызыға килерге сыбыра тимделер. Чооғын тоозып, Андрей Кульков службаны турыстыра апарчатхан тоғынӌыларға ведомство сыйыхтарын читірген.
Ідӧк танығлығ мероприятиеде чоох тутхан архиепископ Ионафан. Алғыстастар тоозылғанда, право хайраллаӌаңнар улуғ нимес концерт кӧріп алғаннар. Концерт соонда мин правительство сыйиин алған полиция майоры Михаил Иптышевнең чоохтазып алғам. Михаил Павлович ГИБДД-зар тоғынарға 2000 чылда килген. Армия соонаң чиит оол істеніс чолын стажер полып пастаан. Пастағызын на улуғ нимес сайбағ иткен водительлерні ГИБДД тоғынӌызы Михаил Иптышев олаңай сизіндірче. Че водитель ікінӌі хати чол чӧрізі правилоларын сайбаза, штраф салча.
- Прай водительлер, пыроларың пілініп, тоғырланминчалар. Штрафтар салып, піс улуғ саайларны тохтатчабыс. Водительлер чолда салбыр тудынған сылтааңда саай пол парза, кізілер чуртазы ӱзіл парарға айабас. Дежурство тузында ідӧк сайбағҷыларны тударға килісче. Піс службаа сығарға хараа-кӱңӧрте тимдебіс, - чоохтапча Михаил Иптышев.
Амғы туста Асхыс аймаандағы ГИБДД-да 17 кізі тоғынча, оларның 9-зы патрульға сыхча. Чыл пасталғаннаң Асхыс аймааның чолларында водительлер 170 хати правилоларны сайбааны ілезіне сығарылған.
Автомобильліг чӧрчетсеңер, піліңер, сірер позыңарның ӱчӱн не нимес, ідӧк чол чӧрізінің пасха араласчыларының ӱчӱн нандырчазар.

Автор : Антон ЧЕРТЫКОВ
 

Комментировать  

Другие новости