ИМҶӀЛЕРГЕ - НАА АВТОМОБИЛЬ

1255 17 января 2018 | Асхыс Чайааны

Хазна полызии. Хакасия правительствозының туразы алнында, Пастағы май площадьында, республиканың имнег тураларына табырах имнег полызиин пирҷең 23 автомобиль пайрамни читірілген 
НАА МАШИНАЛАР РЕСПУБЛИКАНЫҢ ТАБЫРАХ ИМНЕГ ПОЛЫЗИИ СТАНЦИЯЛАРЫНА ПАЗА АЙМАХТАРДАҒЫ ӦӦН ИМНЕГ ТУРАЛАРЫНА ПИРІЛГЕН. ОЛАРНЫ РОССИЯ ПРЕЗИДЕНТІ ВЛАДИМИР ПУТИННІҢ ЧАХИИ ХООСТЫРА ФЕДЕРАЛЬНАЙ ПРОГРАММАҶА АЛҒАННАР. ТАБЫРАХ ИМНЕГ ПОЛЫЗИИН ПИРҶЕҢ НАА МАШИНАЛАР ПӰӰНГІ КӰННІҢ КИРЕКСІНІСТЕРІНЕ КИЛІСТІРЕ СЫҒАРЫЛЧАЛАР.
ХАКАСИЯ ПАЗЫ ВИКТОР ЗИМИН НАА МАШИНАЛАР КЛӰСТЕРІН ИМНЕГ ТУРАЛАРЫНЫҢ ӦӦН ИМҶІЛЕРІНЕ ЧИТІРГЕН.
- Пу имнег транспорты пістің соох хысхыларға паза хомай чолларға кілебинче. Имнег бригадаларының тоғынҷыларына паза ағырчатхан кізілерге пу машиналарда имнег туразынзар чидіп аларға хаҷан даа чылығ паза истіг ползын. Наа машиналар Хакасияның город-аймахтарына пирілді. Амды табырах имнег полызии кізілерге тузында паза чахсы пирілер. Кізі чуртазы иң аарлығ ниме нооза, -чоохтаан Хакасия пазы.
Хакасия - иң кӧп транспорт пирілген регионнарның пірсі. Хорадығлар 60 миллион салковайға тиңнелче. Виктор Зиминнің таниинаң, имнег тураларының автопаркы нааҷылалчатханы уғаа чахсы, Хакасияда ла пір чылда 200 муңҷа республика чуртағҷызы паза аалҷызы табырах имнег туразынзар айланча.
Ідӧк наа машиналарның клӱстерін пайрамни читірчеткенінде Хакасияның хазых хайраллаҷаң министрі Владимир Костюш паза Хакасия пазы орынҷызының тоғызын толдырчатхан Ирина Смолина араласханнар. Олар имнег туралары тоғынҷыларын табырах полызығ пиреріне уғаа киректелчеткен транспорт пирілчеткенінең алғыстааннар. Табырах имнег полызииның «В» класстығ автомобильі имҷілернің паза фельдшерлер ӧмезінің полызиинаң ағырығ кізіні табырах имнег туразынзар ағылар. Ағаа хоза, автомобильде ағырығ кізее, сыныхтағ иртіріп, толдыразынаң табырах полызығ пирілер, ол санда реанимация оңдайлары кӧріл парған. Транспортта мындағ оборудованиелер пар: электрокардиограф, ӧкпелерге искусственнай вентиляция итчең аппарат, ханда сахарның синін сыныхтаҷаң глюкометр, дефибриллятор, наркоз пирҷең аппаратура паза даа пасхазы. Автомобиль хайда парчатханын піліп алар ӱчӱн ГЛОНАСС система турғызыл парған. Салонны чылыдар оборудование пар.
Асхыс аймааның ӧӧн имнег туразына табырах имнег полызиин пирҷең ікі машина читірілген. Асхыстағы ӧӧн имнег туразының ӧӧн имҷізі Айвар Николаевич Кольчиков кӧңнінең паза сағыстарынаң ӱлескен:
- Пістің аймахта прай 64 аал. Оларда табырах имнег полызиин пирҷең тӧрт станция тоғынча. Асхыстағы ӧӧн имнег туразының автопаркында табырах имнег полызиин пирҷең тӧрт машина тоғынча. Че олар иргілер, аннаңар удаа сайбалчалар. Оларны тыхтирға килісче. Наа машиналар піске уғаа кирек полған. Пу ікі автомобиль Асхыс аалдағы ӧӧн имнег туразының автопаркынзар парар.
Асхыстағы табырах имнег полызии станциязының телефонына кӱнде 20-25-че хығыртығ кірче. Транспорт хомайда, имҷілер хығыртыға чахсы чӧр полбинчалар. Асхыстаң иң оортах Палыхтығ суғ аал орныхча. Андар 160 километр парарға кирек. Амды пу наа машиналар аймах чуртағҷыларының хазиин паза чуртазын хайраллирына улуғ туза поларлар.
Мин пістің имнег туразы тоғынҷыларының адынаң Россия президент Владимир Путинге паза Хакасия пазы Виктор Зиминге мындағ танығлығ паза имнег туразына киректелчеткен сыйых ӱчӱн улуғ алғызыбысты читірчем.
Федеральнай программаҷа Россия правительствозы чарадиинаң пістің республиканың имнег тураларының автопаркы 23 автомобильге нааҷылалды. Амды республика чуртағҷыларының хазиин паза чуртазын хайраллап халарға ниик полар.
Соомда: Асхыстағы имнег туразының ӧӧн имҷізі Айвар КОЛЬЧИКОВ паза наа машиналарның водительлері Вячеслав ЧАПТЫКОВ, Фёдор ТИННИКОВ
Автор : Наталья ТЮКПЕЕВА
http://khakaschiry.ru/news/detail.php?ID=5200

Комментировать