ЧОННАҢ ЧАҒЫН ПАЛҒАЛЫС ТУТЧАЛАР

320 19 апреля 2018 | Асхыс Чайааны

Ӱр ниместе Ағбан городтағы улуғлар чӧбі президиумының чыылиинда пылтыр иділген тоғыстарны ӱзӱргеннер. Пӱкӱлее алза, тоғыс асхынах иділбиндір. Улуғлар чӧбі прай даа мероприятиелерде тӧреміл араласхан. Кӧзідімге, Чыл пазы, Ӱртӱн тойы ӱлӱкӱннерні иртірерге полысханнар.
Улуғ мероприятиелерні алза, пылтыр Хакасия хакас чонның пастағы съездтеріне 100 чыл толғанын чалбах таныхтаан. Ол пайрам пастап Ағбанда, анаң Чарков аалда ирткен. Олох кӱннерде пістің саблығ ученай, тархын наукаларының докторы Игорь Кызласовтың хакастардаңар паза хакас этнозынаңар книгазының презентациязы полған.
Ағбан городтағы улуғлар чӧбі городта ла нимес, ідӧк республикада иртірілчеткен тоғазығ-чыылығларда араласхан. Іди пылтыр Таштып аймаанда Хобый сӧӧгіне кірчеткен хакастарның 9 фамилиязының улуғ ӱлӱкӱні полған. Анда 2019 чылда хобыйлар пазох улуғ чыылығ иртірерге чаратханнар.
Улуғлар чӧбінің президиум араласчызы Александр Котожеков пылтыр Казах чирінің Астана ӧӧн городында чоннар аразындағы тенгрияннарның конференциязында пол килген. Анаң ол Новосибирскте Сибирь чоннарының фестивальында араласхан. Аннаң хада ідӧк улуғлар чӧбі президиумының араласчызы Зоя Шурышева полған.
Улуғлар чӧбінің кізілері чииттернең, олғаннарнаң чағын палғалыс тутчалар. Улуғ хайығны тӧреен тілні тилідеріне салча. Пӱӱл мындағ тоғыстар аннаң андар узарадылча.

Автор : Виктор ЧЕПЧИГАШЕВ, Ағбан городтағы улуғлар чӧбінің кнезі
 

Комментировать