Рубрики

ЧАРЫДЫҒЛЫҒ ТОҒЫСТЫ ЧАХСЫ АПАРҶАҢ

899 20 декабря 2017 | Асхыс Чайааны

Пу 1980 чыллар. Асхыс аал. Чайғы. Тасхар ізіг кӱн турча. Пірее-пірее сӧрӧн таныҷах сабыл килче. Кӧрзем, одырчыхта ікі ууҷа одырча, ниме-де чоохтасча. Пірсін мин таныпчам, че ікінҷізі мағаа таныс нимес. Оларнаң хости чоох-чаахнаң одырыбыстым.
-    Сірерні таныбинчам. Хайдаң килгезер? - сурғам мин.
-    Мин Курган городтаң пеер, тӧреен чирімзер, килдім, - нандырча ол, - адым - Анастасия Викторовна Саражакова. Тӧреем Асхыста.
Асхыстағы школаны тоосхан соонаң Анастасия Викторовнаны Боградтағы наа азылған школазар тоғынарға ысханнар. Соонаң ол Чабак аймаанда (амғы Шира аймаа) тоғынған.
Анастасия Викторовнаны, чон аразында чарыдығлығ тоғысты чахсы апарчатханын сизініп, 1929 чылда Москвазар ӱгренерге ысчалар.
1934 чылда Анастасия Саражакованы пазох Москвазар партшколазар ӱгренерге ысханнар. «Паза килізер бе андағ ӱлӱс? Пар», - теен партийнай тоғынҷы Андрей Кузургашев. Анастасия, кічіг палазын хада алып, Москвазар парған.
Анда аны чахсы удурлааннар, общежитиеде комната пиргеннер. Ол кӧмес орайлат салған, аннаңар хайди поларын пілбеен, алай нанҷаң ма тіп сағынған. Че партийнай тоғынҷы Надежда Константиновна Крупская ағаа тіптір: «Сағаа ӱгренерге кирек». Анастасия Саражакованың палазын Крупская олған садына пирерге полыс пирген.
-    Хайдаң килгезің? - сурған Анастасиядаң Надежда Константиновна.
-    Хакасиядаң, - нандырған ол.
-    О, таныс чирлер! Минсуғ, Сус ... Піс Владимир Ильич Лениннең хада анда ызығда полғабыс. Піс чир-суғҷы полтырбыс.
Анастасия Викторовна Саражакова, партшколаны тоозып, Хакасиязар айланғанда, аны Таштыптағы совхозсар ысханнар, ол анда парторг полған. Соонаң Асхыс аймаанда «Ленин чӧбі» колхозта кнес полған. Ол КПСС обкомының пропаганда паза агитация пӧлиинің инструкторы полғанох. Іди Анастасия Викторовна хайдағ даа тоғыста махтағлығ істенген, хыйға чоохтығ полған.
-    Сағам Курган городта Светлана хызымда чуртапчам. Хызым комсомол обкомының лекторскай пӧлиинде тоғынған. Ағбан - Новокузнецк тимір чол пӱдірілгенде, оолғым пастағы таарлағ поездтің тінін тутхан, -    чоохтаан позынаңар Анастасия Саражакова.

Автор : Нина ЧАНКОВА
http://khakaschiry.ru/news//detail.php?ID=4035

Комментировать