АСХЫС ЧИРІНІҢ ЧАЙААЧЫ УСТАРЫ ТООЗЫЛБАС

316 31 мая 2018 | Общество, Культура, Благоустройство

Танығлығ иир. Асхыстағы искусство школазы ӱгредіг чылын тоозыбысты. Аны тоосхан олғаннарға выпускной Культура туразында ирткен. Андох искусствоның аймах кӧрімнерінде чахсы чидіглерге читкеннерге сыйыхтар читірілген.
Пис час иирде Культура туразында Асхыстағы искусство школазының выпускнойы иртер. Олғаннар, иртеезін киліп, фойеде чӱгӱріс чӧрчелер.
Пір хызыҷах кӧріндес алнында хайда-хайдар хойралча. Теелбекке чӧрче полар тіп сағын салғам, азағастарынаң матап тібірет парча.
Школа тоосчатханнарға чарыдылған иир пасталыбысты. Асхыс аймааның культура управлениезінің устағҷызы Келемана Барашкова, сценаа сығып, прайзын ӱлӱкӱннең алғыстапча. Валера Тодышевті, Иван Полисовойны сценазар хығырып, оларға Аарластығ пічіктер читірче. Пу оолағастар постарының устарынаң Асхыс аймаан матап сабландырчалар тіп чоохтаан Келемана Васильевна.
Анаң номинациялар хоостыра сыйыхтар пиріл сыххан. «Хрусталь маймағас» номинацияда «Акварель» хореография ансамбльы чиңіс тутхан. Искусство школазының пастағы класс ӱгренҷілері олғаннарны, алғыстап, ырлап пиргеннер. Сыйыхтарны Татьяна Каменщикова читірген.
«Волшебная кисть» номинацияңа хоосчыларға сыйыхтарны Снежана Асочакова читірген. Оларға сыйых идіп, «Акварель» ансамбльның кічіглер клазы «Тарантела» теелбек толдырған.
«Беглые пальчики» фортепианонаң ойнапчатхан устарның номинацияда сыйыхтығ орыннарға турысхан олғаннарға сыйыхтарны читірген Изольда Тоданова.
Чиңісчілернің пірсі Диана Токмашова, узын кӧзідіп, фортепианонаң ойнап пирген. Леонид Канзычаков «Алтын хыл» номинацияда араласханнарның иң артыхтарына сыйыхтар читірген. Валера Тодышев, мандолинанаң ойнап, узын кӧзіткен.
«Виртуозная гармонь» номинацияда баяннаң паза аккордеоннаң ойнапчатхан олғаннарның аразында артыхтарны таныхтап, сыйыхтар читірген Медина Ахпашева. Ваня Полисовой баяннаң матап ойнапчатханын кӧзіт пирген.
Асхыстағы искусство школазын тоосхан олғаннар. Анаң паба-іҷелер сценаа сыхханнар. Олар, пірігіп, школаа сертификат читіргеннер. Аны хоостыра школа мебель алып алар.
Халғанҷызында школа устағҷызы Неля Григорьевна Иптышева школа тоосхан олғаннарға аттестаттар паза сомнығ альбомнар читірген. Кызлас аалда школа филиалы тоғынчаттыр, андағы ӱгренҷілер
килгеннерӧк. Неля Григорьевна ӱгретчілерні сценазар хығырча, олғаннарнаң хада ырлапчалар.
Мынынаң иир тоозылған. Искусство школазының чуртазы аннаң андар узарадылча, анзын пастағы класстағы олғаннар кӧзіткеннер.

Автор : Михаил ИДИМЕШЕВ
 

Комментировать